اول شي انا ما مصدق انه شرطة عمان السلطانيه هي اللي خلصت الموقف ...المهم يا اخوي الله يقول وجعلنا لكل شي سببا ...ولابد من سبب وسبب وجيه مع هالشباب في هالشغله ومعذورين الشباب صدقني ترا بتكثر السرقه والمشاكل وغيره في بلدنا لانه الحال اللي نشوفه صار صعب لا وظايف ولا نسب في الثنويه العامه ولا حد يحترمك ولا شي وطموحات الشباب كبيره ومن حق الشباب انه يحلم ويعيش حياته بس الحكومه ترفض...انا اسالك انت يا اخوي جواد الليل ...انا وانته وكل شخص على أرض عمان صغير وكبير جاهل وعاقل يعرف انه الوزير العماني يعيش عيشة اهل العز وما بجهده لا والله بسرقته لفلوس الدوله ...ليش الفقير يحاسبوه اذا سرق والوزير ماحد يقول له شي واله يعني الدين على الفقير والغني شرى الدين بفلوسه....خلنا واقعيين ونتعامل مع الموضوع بواقعيه وخلنا نقول انه الحاجه هي اللي فرضت على الشباب هالشي

فعلا كلام أخي ابن الباطنة صحيح .. الظروف التي يعايشها الكثيرين في البلاد تدفعهم إلى مثل هذه التصرفات الغير مسؤولة .. هنا يأتي دور الحكومة في البحث عن حلول لمثل هؤلاء الشباب
ولكن بالطبع
لا يوجد مبررات للجريمة مهما كانت ومهما كانت الفاقة والحاجة
ولكنها مجرد اسباب وأسباب قد تتحول إلى مبررات في نظر هؤلاء .. ثم إن حالة الشباب بصراحة حالة يرثى لها يعني تصوروا أن يتخرج الشاب من الثانوية وبمعدل يفوق السبعين وهو معدل لا يستهان به في الكثير من الدول ثم لا يجد جامعة تأويه ولا وظيفة تحويه ؟؟!!!
ماذا نتوقع من هؤلاء .......

تحياتي

لا حول ولا قوه الا بالله العلي العظيم شوف اخرتها

الموضوع في زياده بعد لاني اعرف شخص يعمل هناك وخبرنا بالسالفه انه جا شخص بالصبح الى كاونتر القروض واجا يسال عن القروض وكان غرضه انه يشوف المكان وياخذ فكره عن الاشخاص الموجودين بالفرع حتى يتسنى له انه يدخل الفرع ويسرق

وطلع وراح يحيب اوين الاوراق اللازمه للقروض ورجع بعد ساعه فتره كذي ومعاه الاوراق وكان موجود الى ماسكروا الباب الامامي الساعه واحده وبعد مااتاكد انه الباب مسكر اشهر السلاح على الموظفين وطلب منهم الفلوس واعطوه الكاش كاملا ولكن الحقير كان يملك مسدس قديم االسكتون نوعيه قديمه وجمع كل الموظفين قدامه وماكفاه السرقه قال انه راح يقتل كل اللي بالفرع عشان شافوا وجهه وكان اخوه ينتظره برع وشريكه بالجريمه وهما من حله السد اثنين

واطلق النار على مدير الفرع على جنب الظهر مكان بجسمه ويوم شافوا الشباب الموظفين انه قتل مديرهم وهو يحاول انه يحط الرصاصه الثانيه بالبندقيه السكتون هجموا عليه الموظفين وضربوه وربطوه وكانت هذه خطوه سريعه وموفقه منهم انهم تداركوا الموقف وهجموا على الحرامي قبل مايطلق عليهم هما بعد تقول فيلم بوليسي وسكروا جميع ابواب الفرع عشان مايجي شريكه وخبروا الشرطه بعد ماحبسوه بالحمام وضربوه ضرب يستاهل عليه

والادهي انه صار يبكي وقال لهم ماابي فلوس خذو كل اللي تبوه بس خلوني اروح وانه كان يبي يتزوج مشان كذي سرق عذر اقبح من ذنب قتل واحد وحرامي وبعد ندمان ويبي السموحه شوفوا اخرتها البطاله والتربيه الفاسده يفكروا الدنيا لعبه وانه بسهوله ممكن يخططوا لجريمه مثل هذه ومافي جريمه كامله وبعد هما شباب في مقتبل العمر هو واخوه

الله يهديهم ويهدي الجميع واتمنى ان ينالووا اشد انواع العقاب حتى يكونوا عبره لغيرهم ولا تضيع ويهدر ارواح الناس بسهوله لانه ارواح الناس مو لعبه

ويجب الحذر دوما بكل مكان بالبيوت بالاسواق بالبنوك بالمصارف لانه الحراميه ممكن يوصولوا بكل مكان ولابد ان تكونوا يقضين وحذرين

وضيعوا مستقبلهم وراء القضبان بالسجون من اجل خفنه من المال الحرام ووسوسه الشيطان الله يهديهم ويهدينا اجمعين

ولا حول ولا قوه الا بالله العلي العظيم